ឯកឧត្តម អភិបាលខេត្ត ចុះជម្រុញលើកទី២ លើការសាងសង់ផ្លូវបេតុងប្រវែង ១១០០ ម៉ែត្រ ក្នុងក្រុងកំពត កំណាត់ផ្លូវជាតិលេខ ៣
ល្ងាច. ថ្ងៃអង្គារ ៩រោច ខែអាសាឍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី ១៤ ខែកក្កដា ឆ្នាំ២០២០ ឯកឧត្តម ជាវ តាយ អភិបាលខេត្ត បានដឹកនាំមន្ទីរ ស្ថាប័នជំនាញចុះជម្រុញលើកទី២ លើការសាងសង់ផ្លូវបេតុងប្រវែង ១១០០ ម៉ែត្រ ក្នុងក្រុងកំពត កំណាត់ផ្លូវជាតិលេខ ៣ ដោយមានការចូលរួមពីតំណាងក្រុមហ៊ុនសាងសង់ និងក្រុមហ៊ុនត្រួតពិនិត្យលក្ខណៈបច្ចេកទេសផងដែរ។
ការចុះជម្រុញនេះធ្វើឡើងដើម្បីត្រួតពិនិត្យលក្ខណៈបច្ចេកទេសតាមដានវឌ្ឍនភាពការងារសាងសង់ ដើម្បីធានាគុណភាពរឹងមាំប្រើប្រាស់ជាប់បានយូរអង្វែង ជាពិសេសជម្រុញឲ្យក្រុមហ៊ុនសាងសង់ផ្លូវបេតុងនេះឲ្យលឿន ដោះស្រាយបញ្ហាការធ្វើដំណើរកកស្ទះចរចារ ការរស់នៅរបស់ប្រជាពលរដ្ឋនៅសងខាងផ្លូវប្រចាំថ្ងៃ។
សូមបញ្ជាក់ថា៖ គម្រោងស្ថាបនាផ្លូវបេតុងចាប់ពីភ្លើងស្តុបផ្លូវបំបែកផ្សារសាមគ្គី ទៅដល់ផ្លូវរថភ្លើង គឺជាគម្រោងផ្លូវស្ថាបនាបេតុងសរសៃដែក មានប្រវែង ១១០០ម៉ែត្រ ទទឹង ១២,៨ម៉ែត្រ កម្រាស់ ២,៤តឹក ដាំដើមឈើសងខាងផ្លូវ រៀបចំខឿន ការ៉ូឡាអមសងខាងផ្លូវប្រវែង ២ម៉ែត្រ។
ជាមួយគ្នានោះផងដែរ ឯកឧត្ដម អភិបាលខេត្ត មានប្រសាសន៍ថា កំណើនយានយន្ត ភ្ញៀវទេសចរណ៍ បញ្ហារស់នៅរបស់ប្រជាពលរដ្ឋ សងខាងផ្លូវ បញ្ហាកកស្ទះចរាចរណ៍នៅក្នុងក្រុងជាប្រចាំ ដោយសារការស្ថាបនាផ្លូវបេតុងនេះ មានភាពយឺតយ៉ាវ គ្រឿងចក្របម្រើការងារចាក់បេតុងមិនគ្រប់គ្រាន់។ គោលបំណងខេត្ត គឺជម្រុញឲ្យក្រុមហ៊ុនសាងសង់បន្ថែមនូវក្រុមម៉ៅការ ពន្លឿនការចាក់បេតុងឲ្យបាន១ថ្ងៃ ១០០ម៉ែត្រ និងការដាក់លូបង្ហូរទឹក ការរៀបការ៉ូឡាសងខាងផ្លូវ ត្រូវធ្វើស្របនឹងការស្ថាបនាផ្លូវ ដើម្បីឲ្យការងាររួចរាល់ព្រមគ្នា ហើយនៅពេលប្រតិបត្តិចាក់បេតុង ក្រុមហ៊ុនត្រូវជូនដំណឹងមកអាជ្ញាធរមានសមត្ថកិច្ច ដើម្បីជួយសម្រួលចរាចរ។ កន្លងមក ថ្នាក់ដឹកនាំ បានចុះជម្រុញការងារម្តងរួចហើយ កាលពីថ្ងៃទី ២៥ ខែ មិថុនា ឆ្នាំ២០២០។
ជាលទ្ធផលនៃការចុះពិនិត្យនេះ ក្រុមហ៊ុនសាងសង់ សន្យាថានឹងបន្ថែមក្រុមម៉ៅការសាងសង់១ទៀត នាពេលឆាប់ៗនេះ មកស្ថាបនាផ្លូវបេតុងប្រវែង ១១០០ម៉ែត្រ ឲ្យបានលឿន ដោយកែសម្រួលលក្ខណៈបច្ចេកទេស សម្ភារៈ និងគ្រឿងចក្រ បម្រើឲ្យការងារស្ថាបនាបេតុង៕