ឧបនាយករដ្ឋមន្ត្រី ហោ ណាំហុង សន្តិភាពនៅតែមានភាពរឹងមាំទូទាំងប្រទេស មានការអភិវឌ្ឍកាន់តែច្រើនឡើង ប្រជាជនកាន់តែសប្បាយរីករាយ ដោយសារមានជីវភាពកាន់តែធូធារ

ភ្នំពេញ ៖ ឧបនាយករដ្ឋមន្ត្រី ហោ ណាំហុង នៅថ្ងៃទី០១ ខែមករា ឆ្នាំ២០២០ ដែលជាថ្ងៃដំបូងនៃដើមឆ្នាំថ្មី បានយល់ឃើញថា ស្ថា​ន​ភាពនៅប្រទេសកម្ពុជា នៅឆ្នាំ២០២០នេះ ក៏ដូចស្ថានភាពប្រទេសកម្ពុជា កាលពីឆ្នាំមុនៗដែរ គឺសន្តិភាពនៅតែមានភាពរឹង​មាំ​ទូទាំងប្រទេស មានការអភិវឌ្ឍកាន់តែច្រើនឡើង ប្រជាជនកាន់តែសប្បាយរីករាយ ដោយសារមានជីវភាពកាន់តែធូធារ ។

ឧបនាយករដ្ឋមន្ត្រី ហោ ណាំហុង បានបញ្ជាក់ថា ខ្ញុំយល់ថាឆ្នាំកន្លងមក ក៏ដូចឆ្នាំមុនៗដែរ ប្រទេសយើងបានសន្តិភាពពេញទីទាំ​ង​ស្រុង នៅទូទាំងប្រទេស ប្រជាជនយើងរីករាយសប្បាយរស់នៅក្នុងប្រ​ទេសមួយ ដែលមានសន្តិភាពរឹងមាំ មានស្ថិរភាពន​យោ​បា​យ មានការអភិវឌ្ឍលើគ្រប់វិស័យទាំងអស់ ។

សម្រាប់លោកឧបនាយករដ្ឋមន្ត្រី បានកត់សម្គាល់ថា ឆ្នាំកន្លងមកប្រទេសកម្ពុជាត្រូវបានការពារដោយសម្តេចតេជោ ហ៊ុន សែ​ន ដែលជានាយករដ្ឋមន្ត្រី ដែលសម្តេចបានការពារនូវឯករាជ្យ និងអធិបតេយ្យភាពពេញទី មិនឲ្យបរទេសណាជ្រៀតជ្រែកចូលកិ​ច្ចការផ្ទៃក្នុងបានទេ ។ សម្តេចតេជោ ហ៊ុន សែន ថែមទាំងធ្វើឲ្យប្រជាជនមានភាពសប្បាយរីករាយ ដោយសារជីវភាពធូធារ ក្នុង​ពេ​លដែលប្រទេសផ្សេងៗទៀត ដូចជានៅអាមេរិកឡាទីន នៅមជ្ឈិមបូព៌ា និងប្រទេសមួយចំនួនទៀត កំពុងមានភាពច្របូកប្របល់ និងគ្មានសន្តិភាពពេញលេញ ។

ឧបនាយករដ្ឋមន្ត្រី ហោ ណាំហុង បានបន្តទៀតថា ក្នុងនាមខ្ញុំជាខ្មែរមួយរូប ខ្ញុំមានមោទនភាពណាស់ ហើយក៏ដូចជាប្រជាជនយើងដែរ មានការរីករាយណាស់ ដែលរស់នៅក្នុងប្រទេសមួយ ដែលមានសន្តិភាពពេញទី មានការអភិវឌ្ឍរីកចម្រើនលើគ្រប់វិស័​យ ពេញមួយឆ្នាំទៅមួយឆ្នាំ កាន់តែកើនឡើងៗ ធ្វើឲ្យជីវភាពប្រជាជនកាន់តែធូរស្រាល កាន់បន្ថយភាពក្រីក្រ នៅប្រទេសយើងនេះ​ ។

លោកបន្ថែមទៀតថា នៅឆ្នាំ២០២០នេះ ប្រទេសកម្ពុជាត្រូវធ្វើជាម្ចាស់ផ្ទះ រៀបចំកិច្ចប្រជុំកំពូលអាស៊ីអឺរ៉ុប ដែលមានប្រមុខរដ្ឋ ប្រ​មុខរដ្ឋាភិបាល ប្រមាណជាង ៥០ប្រទេសចូលរួម ។ ប្រមុខរដ្ឋ ប្រមុខរដ្ឋាភិបាល ដែលនឹងមកកម្ពុជាទាំងនោះ ត្រូវបានឧប​នា​យ​ករដ្ឋមន្ត្រី ហោ ណាំហុង សង្ឃឹមថា ពួកគេនឹងបានឃើញកម្ពុជាមានសន្តិភាពពេញទី មានស្ថិរភាពនយោបាយ មានការរីក​ច​ម្រើ​នលើគ្រប់វិស័យ ដែលជារឿងគួរឲ្យមានមោទនភាព ៕