សម្តេចតេជោ ហ៊ុន សែន អញ្ជើញទៅកាន់ទីតាំងរលំបាក់អគារជាថ្មីម្តងទៀត ដើម្បីបន្តដឹកនាំបញ្ជាប្រតិបត្តិការរុករកជនរងគ្រោះ គិតត្រឹមព្រឹកថ្ងៃទី០៤ ខែមករា ឆ្នាំ២០២០នេះ បានរកឃើញជនរងគ្រោះចំនួន ២៥នាក់ មានជនរងគ្រោះ ៧នាក់បានស្លាប់ និងរងរបួស ១៨នាក់

ខេត្តកែប ៖ បន្ទាប់ពីចំណាយពេលវេលាអស់ពេញមួយយប់ នៅព្រឹកថ្ងៃទី០៤ ខែមករា ឆ្នាំ២០២០នេះ សម្តេចតេជោ ហ៊ុន សែន នា​យ​ករដ្ឋមន្រ្តីនៃព្រះរាជាណាចក្រកម្ពុជា បានអញ្ជើញទៅកាន់ទីតាំងអគារបាក់រលំ នៅខេត្តកែបជាថ្មីម្តងទៀត ដើម្បីបន្តដឹ​កនាំ​បញ្ជារុករកជនរងគ្រោះ ដែលបាត់ខ្លួនកប់នៅក្នុងគំនរអគារនេះសម្រាប់ថ្ងៃទី២ ។

គិតត្រឹមព្រឹកថ្ងៃទី០៤ ខែមករា ឆ្នាំ២០២០នេះ ក្រុមអ្នកជួយសង្រ្គោះចម្រុះ បានរកឃើញជនរងគ្រោះចំនួន ២៥នាក់ មានជនរងគ្រោះ​ ៧នាក់បានស្លាប់ រងរបួស ១៨នាក់ ដែលកប់នៅក្នុងគំនរអគារកម្ពស់ ៦ជាន់ រលំបាក់នៅខេត្តកែប ។

ពាក់ព័ន្ធករណីនេះ លោកឧបនាយករដ្ឋមន្ត្រី ជា សុផារ៉ា បានចេញសេចក្ដីសម្រេច ស្ដីពី ការបង្កើតគណៈកម្មការ ធ្វើកោ​សល្យវិច្ច័​យ​អគារ គណៈកម្មការធ្វើកោសល្យវិច្ច័យអគាររលំនៅខេត្តកែប ដែលមានលោក ទេព ធន រដ្ឋលេខាធិការ ជាប្រធាន និង លោក ប៊ិ​ន សម្បត្តិថារ័ត្ន អនុរដ្ឋលេខាធិការ ជាអនុប្រធាន រួមជាមួយនឹងសមាជិកចំនួនទៀត ទៅលើអគាររបស់ឈ្មោះ ឯក សារុន និ​ង​ ប្រពន្ធ ឈ្មោះ ឈីវ សុធី ដែលបានបាក់រលំនៅថ្ងៃទី៣ ខែធ្នូ ឆ្នាំ២​០​​២០ ស្ថិតនៅភូមិកែប សង្កាត់កែប ក្រុងកែប ខេត្តកែប ។

គណៈកម្មការធ្វើកោសល្យវិច្ច័យអគារនេះ ធ្វើកោសល្យវិច្ច័យ ទៅលើអគាររបស់ឈ្មោះ ឯក សារុន និង ប្រពន្ធ ឈ្មោះ ឈីវ សុធី ដែ​ល​​​បានបាក់រលំនៅថ្ងៃទី៣ ខែធ្នូ ឆ្នាំ២​០​​២០ ស្ថិតនៅភូមិកែប សង្កាត់កែប ក្រុងកែប ខេត្តកែប ។ ការបង្កើតគណៈកម្មាធិការកោ​សល្យវិច្ច័យ គឺដើម្បីត្រួតពិនិត្យ គុណសម្បត្តិរបស់អ្នកសាងសង់ ធ្វើរបាយការណ៍លទ្ធផល ជូនក្រសួង បំពេញភារកិច្ចផ្សេងទៀ​ត​​​ដែលថ្នាក់ដឹកនាំក្រសួងប្រគល់ជូន ។