ផ្ទះប្រជាពលរដ្ឋជាង១៥១ខ្នង ត្រូវបានអគ្គីភ័យលេបត្របាក់អស់ទាំងស្រុង នៅសង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ

ភ្នំពេញ ៖  ផ្ទះប្រជាពលរដ្ឋជាង១០០ខ្នង ត្រូវបានអគ្គីភ័យលេបត្របាក់អស់ទាំងស្រុង បង្កឲ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ច ចេញរថយន្តពន្លត់អគ្គិភ័យ  មកអន្តរាគមន៍បាញ់ពន្លត់  កាលពីវេលាម៉ោង១ៈ៤០នាទីរំលងអាធ្រាត្រ ឈានចូលថ្ងៃទី៦ ខែមករា ឆ្នាំ២០២០ នៅតាមអតីតផ្លូវរថភ្លើង  កែងនឹងទំនប់៧០  ស្ថិតក្នុងសង្កាត់ទួលសង្កែទី១ ខណ្ឌឫស្សីកែវ  រាជធានីភ្នំពេញ ។

 

តាមប្រភពព័ត៌មានពីប្រជាពលរដ្ឋបានឲ្យដឹងថា   មុនពេលកើតហេតុ  គេឃើញមានផ្សែងហុយចេញពីផ្ទះប្រជាពលរដ្ឋមួយកន្លែ​ង  បង្កចេញជាអណ្ដាតភ្លើង ឆាបឆេះយ៉ាងសន្ធោសន្ធៅ រួចក៏បានរាលដាលដល់ផ្ទះផ្សេងៗទៀតតែម្តង  ភ្លាមៗនោះបងប្អូនប្រជាពលរដ្ឋ បានរាយការណ៍ទៅសមត្ថកិច្ច ហៅរថយន្តពន្លត់អគ្គិភ័យ មកជាច្រើនគ្រឿងមកបាញ់ពន្លត់ ។

 

សមត្ថកិច្ចបានឲ្យដឹងថា ក្នុងករណីគ្រោះអគ្គីភ័យខាងលើនេះ គឺរងការខូចខាតដល់ផ្ទះប្រជាពលរដ្ឋ អស់១៥១ខ្នង ដោយសារផ្ទះប្រជាពលរដ្ឋ នៅទីតាំងកើតហេតុខាងលើនេះតូចៗ និងសម្បូរទៅដោយសង់អំពីឈើប្រក់ស័ង្កសី ចំណែកទ្រព្យសម្បត្តិវិញ សម​ត្ថកិច្ចមិនហ៊ានសន្និដ្ឋានថា អស់ប៉ុន្មាននៅឡើយទេ តែក្នុងករណីនេះ មិនបណ្ដាលឲ្យមានមនុស្ស រងរបួសនោះទេ ។