លោក អ៊ិត សុធា ព្រះរាជអាជ្ញាអបសាលា ដំបូងខេត្តកំពង់ឆ្នាំង បាន ដឹកនាំកម្លាំងចុះបង្ក្រាបគ្រឿងញៀន ២,៥គីឡូក្រាម នៅឃុំក្រាំងដីមាស
ខេត្តកំពង់ឆ្នាំង ៖ លោក អ៊ិត សុធា ព្រះរាជអាជ្ញាអបសាលា ដំបូងខេត្តកំពង់ឆ្នាំង បានដឹកនាំកម្លាំងនគរបាលប្រឆាំងបទល្មើសគ្រឿងញៀន នៃស្នងការដ្ឋាននគរបាលខេត្តកំពង់ឆ្នាំង ចុះធ្វើការបង្ក្រាបគ្រឿងញៀនទ្រង់ទ្រាយធំ មួយកន្លែងនិងបានឃាត់ខ្លួនជនសង្ស័យម្នាក់ រួមនិងវត្ថុតាងបទល្មើសជាក់ស្តែង ។
នៅក្នុងប្រតិបត្តិការបង្ក្រាបខាងលើនេះធ្វើឡើងកាលពីថ្ងៃទី១១ ខែសីហា ឆ្នាំ២០២២ នៅចំណុចផ្ទះជនសង្ស័យ មួយកន្លែង ស្តិតនៅក្នុងភូមិធ្នង់កំបុត ឃុំក្រាំងដីមាស ស្រុករលាប្អៀរ ខេត្តកំពង់ឆ្នាំង ។
បើយោងតាមរបាយការ៍សមត្ថកិច្ចស្ថិតក្នុងការបង្ក្រាបបានឲ្យដឹងថា ជនសង្ស័យដែលត្រូវសមត្ថកិច្ចឃាត់ខ្លួនឈ្មោះ វណ្ណៈ បញ្ញាវឌ្ឍន៍ ភេទប្រុស អាយុ ២៦ឆ្នាំ មុខរបរ បុគ្គលិករតនាគារសាខាខេត្តកំង់ឆ្នាំង មានទីលំនៅភូមិធ្នង់កំបុត ឃុំក្រាំងដីមាស ស្រុករលាប្អៀរ ខេត្តកពង់ឆ្នាំង ។
ក្នុងប្រតិបត្តិការបង្ក្រាបខាងលើនេះសមត្ថកិច្ចបានចុះធ្វើការឆែកឆេលំនៅដ្ឋានជនសង្ស័យរកឃើញថ្នាំញៀនប្រភេទ មេតំហ្វាតាមីន(ICE) ចំនួន១៦កញ្ចប់លាក់ទុកលើពិដាន និង៩កញ្ចប់ទៀតលាក់ទុកក្នុងទូ ក្នុងបន្ទប់ជនសង្ស័យ សរុបថ្នាំញៀនទាំងអស់មានចំនួន២៥កញ្ចប់ ក្នុងមួយកញ្ចប់ៗទម្ងន់១០០ក្រាម ទម្ងន់សរុប ២,៥ គីឡូក្រាម ជញ្ជីងថ្លឹងថ្នាំញៀនចំនួន៥គ្រឿង, ឧបករណ៍អ៊ុតស្បោងចំនួន១ និង ឧបករណ៍សម្រាប់វេចខ្ចប់(ស្បោង១ដុំ) ។
ក្រោយឃាត់ខ្លួន សមត្ថកិច្ចបាននិងធ្វើការឆែករកឃើញវត្ថុតាងបទល្មើសជាក់ស្តែង ជនសង្ស័យរួមនិងវត្ថុតាងត្រូវបានសមត្កិច្ចធ្វើការនាំខ្លួនរៀបចំចាត់ការទៅតាមនីតិវិធី ផងដែរ ។
សូមបញ្ជាក់ផងដែរថា កិច្ចប្រតិបត្តិការបង្ក្រាបគ្រឿងញៀនខាង លើនេះ ជាករណីបង្ក្រាបទ្រុងទ្រាយដែលមានចំនួនដ៍ច្រើនលើសលុបដែលពីមុនៗមកមិនដែលធ្លាប់មាន នៅក្នុងទឹកដី ខេត្តកំពង់ឆ្នាំង
បច្ចុប្បន្ន ជនសង្ស័យ និងវត្ថុតាងថ្នាំញៀន ត្រូវបានសមត្ថកិច្ចនាំខ្លួនទៅរាជធានីដើម្បីស្វែងរកបក្ខពួក និងមេខ្លោងក្នុងករណីគ្រឿងញៀននេះផងដែរ៕