សិស្សានុសិស្ស និងយុវជនវ័យក្មេងជាក្រុមមនុស្សងាយប្រឈមនឹងគ្រោះថ្នាក់ចរាចរណ៍
ថ្នាក់ដឹកនាំក្រសួងសាធារណៈការ និងអ្នកជំនាញបានបញ្ជាក់ថា សិស្សានុសិស្ស និងយុវជនវ័យក្មេង អាយុចាប់ពី ១៥ ទៅ២៩ឆ្នាំ ជាក្រុមមនុស្សងាយប្រឈមនឹងគ្រោះថ្នាក់ចរាចរណ៍ ដោយសារពួកគាត់មិនទាន់យល់ពីច្បាប់ចរាចរណ៍ គ្មានបទពិសោធក្នុងការបើកបរជាដើម និងបានស្នើដល់ស្ថាប័ន អង្គភាពជំនាញពាក់ព័ន្ធ អាណាព្យាបាល លោកគ្រូអ្នកគ្រូត្រូវឧស្សាហ៍ណែនាំកូនៗអំពីច្បាប់ចរាចរណ៍។
នៅក្នុងទិវាសុវត្តិភាពចរាចរណ៍ និងការប្រកាសផ្តើមអនុវត្តសកម្មភាពសុវត្តិភាពចរាចរណ៍ ដែលប្រារព្ធធ្វើឡើងក្នុងបរិវេណវិទ្យាល័យ ហ៊ុន សែន ត្រសេកកោង ស្ថិតនៅភូមិថ្មី ឃុំថ្មី ស្រុកទឹកឈូ ខេត្តកំពត នៅថ្ងៃទី២២ ខែកញ្ញា ឆ្នាំ២០២២ លោក គឹម បញ្ញា នាយកអង្គការមូលនិធីបង្ការរបួសអាស៊ីប្រចាំនៅកម្ពុជា បានឲ្យដឹងថា បច្ចុប្បន្ននេះក្រុមមនុស្សដែលប្រឈមនឹងគ្រោះថ្នាក់ចរាចរណ៍ជាងគេ គឺសិស្សសាលា និងយុវជនវ័យក្មេងដែលមានអាយុចន្លោះពី ១៥ឆ្នាំ ដល់ ២៩ឆ្នាំ។ លោកបានបន្តថា ជារៀងរាល់ឆ្នាំអ្នកស្លាប់ដោយសារគ្រោះថ្នាក់ចរាចរណ៍នៅកម្ពុជា មានប្រមាណ១២ភាគរយ គឺជាសិស្សនិស្សិត ហើយពាក់កណ្តាលនៃពួកគាត់គឺជាសិស្សានុសិស្សនៅកម្រិតអនុវិទ្យាល័យ និងវិទ្យាល័យ។
លោកជំទាវ មីន មាណវី រដ្ឋលេខាធិការក្រសួងសាធារណៈការ និងដឹកជញ្ជូនបានបញ្ជាក់ថា តាមរបាយការណ៍របស់អគ្គស្នងការនរគបាលជាត៨ខែដើមឆ្នាំ២០២២នេះ មានករណីគ្រោះថ្នាក់ចរាចរណ៍សរុបចំនួន ២.០៥០ករណី ដែលបណ្តាលឲ្យមនុស្សស្លាប់ចំនួន ១.០៨២នាក់ ហើយក្នុងនោះគឺជាយុវជនវ័យក្មេងអាយុចាប់ពី ១៥ឆ្នាំដល់ ២៩ឆ្នាំ ភាគច្រើនជាសិស្សសាលា។ ជំទាវរដ្ឋលេខាធិការ ស្នើដល់លោកគ្រូ អ្នកគ្រូ តាមសាលារៀនទាំងអស់បញ្ជ្រាបច្បាប់ចរាចរណ៍ដល់សិស្សានុសិស្ស ។
សិស្សានុសិស្សបានបង្ហាញពីការយល់ឃើញរបស់ខ្លួនថា គ្រោះថ្នាក់ចរាចរណ៍ គឺពិតជាធ្វើឲ្យ ប៉ះពាល់ដល់អាយុជីវិត ធ្វើឲ្យមានពិការភាព ប៉ះពាល់ដល់ការសិក្សា និងសេដ្ឋកិច្ចគ្រួសារផងដែរ។
លោក ខៀវ រិទ្ធិភ័ណ្ឌ អភិបាលរងខេត្តកំពបានឲ្យដឹងដែរថា គ្រោះថ្នាក់ចរាចរណ៍ក្នុងខេត្តកំពត កើតមានឡើងជាញឹកញាប់នៅលើកំណាត់ផ្លូវជាតិលេខ ៣, ៣១, ៣៣ និងផ្លូវជាតិ៤១, ហើយក្នុងរយៈពេល៩ខែដើមឆ្នាំ២០២២នេះ គ្រោះថ្នាក់ចរាចរណ៍កើតឡើងចំនួន ៩៣ករណី មានការថយចុះចំនួន ៣៥លើក បើប្រៀបធៀបទៅនឹងរយៈពេលដូចគ្នានៃឆ្នាំ២០២១៕