អភិបាលខេត្តកំពត៖ ក្រៅពីកត្តាសុខសន្តិភាពអ្នកដែលត្រូវផ្តល់ភាពសុខសាន្តជូនពលរដ្ឋផ្ទាល់ និងជាអចិន្ត្រៃយគឺអាជ្ញាធរមូលដ្ឋាន
អភិបាលខេត្តកំពតបានលើកឡើងថា ក្រោយពីប្រទេសកម្ពុជាទទួលបានសន្តិភាពពេញលេញលើផ្ទៃប្រទេស មានការអភិវឌ្ឍលើគ្រប់វិស័យដូចសព្វថ្ងៃនេះ អ្នកដែលត្រូវផ្តល់ភាពសុខសាន្ត និងត្រូវដឹងពីសុខទុក្ខរបស់ប្រជាពលរដ្ឋគឺអាជ្ញាធរមូលដ្ឋាន ដែលមានលោកមេភូមិ មេឃុំ ស្មៀន ភូមិបាល មេប៉ុស្តិ៍ ព្រមទាំងមន្ត្រីពាក់ព័ន្ធនៅមូលដ្ឋានផ្ទាល់។
ថ្លែងក្នុងពិធីសំណេះសំណាលជាមួយប្រជាពលរដ្ឋក្នុងមូលដ្ឋានស្រុកបន្ទាយមាស កាលពីព្រឹកថ្ងៃទី២៤ ខែឧសភា ឆ្នាំ២០២៣ ដែលមានប្រជាពលរដ្ឋប្រមាណជាង ១ម៉ឺននាក់ មកពីឃុំចំនួនបួនគឺ៖ ឃុំបន្ទាយមាសខាងកើត ឃុំបន្ទាយមាសខាងលិច ឃុំត្នោតចុងស្រង់ និងឃុំព្រៃទន្លេ ឯកឧត្តម ម៉ៅ ធនិន អភិបាលខេត្តកំពត បានលើកឡើងថា ក្រោយពីសម្តេចតេជោ ហ៊ុន សែន បាននាំយកមកនូវសុខសន្តិភាពពេញលេញពេញផ្ទៃប្រទេសដោយលំបាកដោយជីវិតរួចមក អ្នកដែលត្រូវផ្តល់នូវភាពសុខសាន្តជាអចិន្ត្រៃយ៍ជូនពលរដ្ឋក្នុងមូលដ្ឋាននោះ គឺមានលោកមេភូមិ មេឃុំ ស្មៀន ភូមិបាល មេប៉ុស្តិ៍ រួមនឹងមន្ត្រីពាក់ព័ន្ធក្នុងមូលដ្ឋានផ្ទាល់។
ឯកឧត្តមបានបន្ថែមថា ប្រសិនបើលោកមេភូមិ មេឃុំ ស្មៀន ភូមិបាល មេប៉ុស្តិ៍ ឬមន្ត្រីពាក់ព័ន្ធក្នុងមូលដ្ឋាន មិនបានផ្តល់នូវភាពសុខសាន្តជូនពលរដ្ឋនោះទេ នោះពលរដ្ឋក្នុងមូលដ្ឋាននឹងមិនអាចទទួលបានភាពសុខសាន្តជាអចិន្ត្រៃយ៍នោះទេ។ ឯកឧត្តមបានសង្កត់ធ្ងន់ថា ការផ្តល់ឋានៈតួនាទីខាងលើនេះ គឺដើម្បីឱ្យមកបំរើពលរដ្ឋ មិនមែនអាងមានអំណាច ឋានៈ តួនាទី មកធ្វើបាបពលរដ្ឋ យកដីរដ្ឋធ្វើជាកម្មសិទ្ធិ ឬធ្វើឱ្យប្រជាពលរដ្ឋជួបទុក្ខលំបាកនោះទេ ហើយប្រសិនបើមានករណីនេះឯកឧត្តមនិងមានវិធានការតាមផ្លូវច្បាប់ចំពោះបុគ្គលទាំងនោះ។
ក្នុងឱកាសនោះដែរ ឯកឧត្តមអភិបាលខេត្ត ក៏បានផ្តាំផ្ញើទៅកាន់ប្រជាពលរដ្ឋទាំងអស់ ត្រូវចេះរួបរួមសាមគ្គីគ្នា ស្រឡាញ់គ្នា កុំលាបពណ៌គ្នា រួមគ្នាអភិវឌ្ឍន៍មូលដ្ឋានក្រោមម្លប់សន្តិភាពទាំងអស់គ្នា ជាពិសេសត្រូវចូលរួមរាយការណ៍ពីភាពអសកម្មរបស់មន្ត្រីនៅមូលដ្ឋានដែលបង្កឱ្យមានការលំបាកដល់បងប្អូនទៅកាន់ឯកឧត្តមផ្ទាល់។ ជាមួយគ្នានេះដែរ ឯកឧត្តមក៏បានអំពាវនាវដល់បងប្អូន កូនក្មួយ ដែលគ្រប់អាយុបោះឆ្នោត ទៅចូលរួមបោះឆ្នោតនៅថ្ងៃទី២៣ ខែកក្កដា ឆ្នាំ២០២៣ខាងមុខនេះ ដើម្បីបោះឆ្នោតជូនសម្តេចតេជោ ដែលជាស្ថាបនិកសន្តិភាពឱ្យបន្តដឹកនាំ និងអភិវឌ្ឍន៍ប្រទេសកម្ពុជាបន្តទៅមុខទៀត៕
