ប្រជាពលរដ្ឋរងគ្រោះដោយខ្យល់កន្ត្រាក់ចំនួន០៧គ្រួសារ រស់នៅក្នុងភូមិទួលសាងាំនិងភូមិអង្កោល នៃឃុំអង្កោលបានទទួលអំណោយមនុស្សធម៌ពីឯកឧត្តមបណ្ឌិត សោម ពពិសិដ្ឋ ប្រធានគណៈ កម្មាធិការសាខាកាកបាទក្រហមកម្ពុជា ខេត្តកែប
កែប ៖ នៅរសៀលថ្ងៃសុក្រ ទី២៦ ខែឧសភា ឆ្នាំ២០២៣ ឯកឧត្តមបណ្ឌិត សោម ពិសិដ្ឋ ប្រធានគណៈកម្មាធិការសាខា កាកបាទក្រហមកម្ពុជាខេត្តកែប បានអនុញ្ញាតឲ្យ លោកឆាង ឆៃ ប្រធានអនុសាខាកក្រកស្រុក ជាតំណាងដ៏ខ្ពង់ខ្ពស់ និងលោក លោកស្រីសមាជិក សមាជិកានៃអនុសាខាកក្រកស្រុក ព្រមទាំងមានការចូលរួមពីអាជ្ញាធរមូលដ្ឋាន អោយចុះសួរសុខទុក្ខ និងនាំយកអំណោយមនុស្សធម៌របស់កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែន ជាប្រធាន ទៅផ្តល់ជូនគ្រួសារប្រជាពលរដ្ឋរងគ្រោះដោយគ្រោះធម្មជាតិខ្យល់កន្ត្រាក់ ចំនួន ០៧គ្រួសារ ស្ថិតនៅភូមិទួលសាងាំ និងភូមិអង្កោល នៃឃុំអង្កោល ស្រុកដំណាក់ចង្អើរ។
នាឱកាសនោះ លោកឆាង ឆៃ ក៏បានពាំនាំមកនូវប្រសាសន៍ផ្តាំផ្ញើសួរសុខទុក្ខពីសំណាក់ឯកឧត្តម បណ្ឌិត សោម ពិសិដ្ឋ ប្រធានគណៈកម្មាធិការសាខាកាកបាទក្រហមកម្ពុជាខេត្តកែប ជូនចំពោះបងប្អូនប្រជាពលរដ្ឋដែលមកទទួលអំណោយទាំងអស់ ដោយក្តីនឹករឭកបំផុត ដែលជានិច្ចកាល ឯកឧត្តមតែងតែគិតគូរដឹងសុខដឹងទុក្ខរបស់បងប្អូនប្រជាពលរដ្ឋជួបការលំបាកនៅមូលដ្ឋាន អ្នកមានជំងឺ ចាស់ជរា ស្ត្រីមេម៉ាយកូនច្រើនក្នុងបន្ទុក
ជនងាយរងគ្រោះ និង ជនរងគ្រោះដោយគ្រោះមហន្តរាយផ្សេងៗ ដោយមិនប្រកាន់រើសអើងវណ្ណៈ ជាតិសាសន៍ ពណ៌សម្បុរ ឬនិន្នាការនយោបាយអ្វីឡើយ ពោលគឺ ទីណាមានទុក្ខលំបាក ទីនោះមានកាកបាទក្រហមកម្ពុជា។
អំណោយដែលបានផ្តល់ ក្នុងមួយគ្រួសារៗទទួលបាន រួមមាន ៖
១-ថវិកា ចំនួន១០០,០០០រៀល
២-សង្ក័សីនិង ហ្វីប្រូ ផ្តល់ជូនទៅតាមចំនួន នៃការខូចខាតរបស់គ្រួសារនីមួយៗ ដោយសរុបអស់សង្ក័សី ៦០សន្លឹក និងហ្វីប្រូ ២០សន្លឹក សរុបថវិកាចំនួន៧០០,០០០រៀលផងដែរ ៕