សារពីប្រជាពលរដ្ឋ! ពិតជាថ្លើមធំមែន បុគ្គលម្នាក់ហ៊ានធ្វើសកម្មភាពបោះបង្គោលថ្មរឹងមាំចំពាក់កណ្តាលផ្លូវសាធារណទាំងយប់មិនរំខានអាជ្ញាធរ និងមន្ត្រីជំនាញខេត្តកែប
កែប៖ នាព្រឹកថ្ងៃទី១៥ ខែវិច្ឆិកា ឆ្នាំ២០២៣នេះ ក្រុមការងារ ផ្សារព័ត៌មានយើង ទទួលបានសារពីប្រពលរដ្ឋមកពីខេត្តកែប បានបង្ហាញចំងល់ និងរិះគន់ចំពោះអាជ្ញាធរសង្កាត់ ក្រុង និងមន្ត្រីជំនាញមន្ទីរសាធារណការ និងដឹកជញ្ជូនខេត្តកែប បានបណ្តែតបណ្តោយឱ្យជនមានអំណាច មានឥទ្ធិពលបោះបង្គោលរបងថ្មរឹងមាំទាំងយប់ចំពាក់កណ្តាលផ្លូវក្រាលកៅស៊ូមួយកន្លែងយ៉ាងរំភ្លើយ ដោយគ្មានការរំខានដល់អស់លោកឡើយ។
សេចក្តីរាយការណ៍ របស់ប្រជាពលរដ្ឋ មកកាន់អង្គភាពថា មានករណីបុគ្គលមានអំណាច មានលុយបានបញ្ជាកម្មករប្រើប្រាស់ម៉ាស៊ីនខួងដើម្បីដាំបង្គោលថ្មចំកណ្ដាលទ្រូងផ្លូវ ដោយមិនរំខានដល់អាជ្ញាធរមន្ត្រីជំនាញដែលពាក់ព័ន្ធបន្តិចសោះឡើយ។ ចំពោះទីតាំងផ្លូវដែលត្រូវបានរំលោភដោយបុគ្គលមានអំណាចនោះ ត្រូវបានប្រជាពលរដ្ឋ ប្រាប់ឱ្យដឹងថា ស្ថិតនៅភូមិ-សង្កាត់កែប ក្រុង-ខេត្តកែប។
ប្រជាពលរដ្ឋ បានឱ្យដឹងទៀតថា មិនដឹងជាបុគ្គលនោះមានអំណាច លុយកាក់ បុណ្យស័ក្តិ ខ្នងបង្អែកប៉ុនណានោះ បានជាថ្លើមធំហ៊ានលួចជីកដាំបង្គោលរបងពាក់កណ្តាលទ្រូងផ្លូវទាំងយប់បែបនេះ។
ពួកគាត់បានបន្ថែមទៀតថា ផ្លូវក្រាលកៅស៊ូនេះ ពីដើមឡើយធ្លាយទៅដល់មាត់សមុទ្រ ប៉ុន្តែក្រោយមកគេធ្វើផ្លូវកាត់មួយទៀតកាត់ផ្លូវចាស់នេះ ហើយប្រជាពលរដ្ឋប្រើប្រាស់ចេញ ចូលរាប់សិបឆ្នាំ។
សេចក្តីរាយការណ៍ពីប្រជាពលរដ្ឋ បានបញ្ជាក់ថា ចំពោះបង្គោលរបងដែលត្រូវបានបុគ្គលមានអំណាចដាំរំលោភយកផ្លូវសាធារណនោះមានប្រមាណ ២០ដើម គឺដាំនៅយប់ថ្ងៃទី១៤ ខែវិច្ឆិកា និងមិនបានរំខានអាជ្ញាធរសង្កាត់ ក្រុង និងមន្ត្រីជំនាញមន្ទីរសាធារណការឡើយ។
ពាក់ព័ន្ធករណីខាងលើ លោក ណុប សំអុល ចៅសង្កាត់កែប បានថ្លែងប្រាប់សារព័ត៌មាន យើងនៅថ្ងៃទី១៥ ខែវិច្ឆិកា ឆ្នាំ២០២៣ នេះថា «ចំពោះករណីមានបុគ្កលជាម្ចាស់ដីបានដាំបង្គោលរំលោភលើផ្លូវសាធារណនោះ ខាងអាជ្ញាធរសង្កាត់ និងក្រុងបានចុះទៅទប់ស្កាត់ជាបណ្តោះអាសន្នហើយ ប៉ុន្តែយើងមិនបានជួបក្រុមកម្មករ ឬម្ចាស់ដីនោះទេ»។ លោកចៅសង្កាត់បានបន្ថែមទៀតថា «អត្តសញ្ញាម្ចាស់ដីក៏អាជ្ញាធរមិនទាន់ស្គាល់ដែរ ព្រោះដីក្នុងសង្កាត់កែប ភាគច្រើនអ្នកមកពីឆ្ងាយៗ ហើយសកម្មនោះ អាជ្ញាធរសង្កាត់ពិតជាបានមើលឃើញថា បានរំលោភចូលមកលើដីផ្លូវខ្លះពិតប្រាកដមែន»។
លោក ខេង យ័ន អភិបាលក្រុងកែប បានប្រាប់ថា «ករណីដាំបង្គោលរបងលើផ្លូវនោះ អាជ្ញាធរបានទទួលព័ត៌មានរួចហើយ និងបានឱ្យមន្ត្រីជំនាញភូមិបាល សាធាណការ សហការជាមួយសង្កាត់ ចុះពិនិត្យមើលលើបញ្ហនេះ ដើម្បីសិក្សាស្រាវជ្រាវថា ម្ចាស់ទីតាំងដីនោះពិតជារំលោភលើផ្លូវសាធារណ ឬយ៉ាងណាព្រោះយើងមិនទាន់ច្បាស់លាស់ទេ ត្រូវមានការផ្ទៀងផ្ទាត់ប្លង់កម្មសិទ្ធិ»។
លោកអភិបាលក្រុងបន្ថែមថា «ជាក់ស្តែងយើងមើលទៅឃើញថា រំលោភពាក់កណ្តាលផ្លូវពិតប្រាកដហើយ និងមានសុំច្បាប់អនុញ្ញាតសាងសង់ពីសំណាក់អាជ្ញាធរសង្កាត់ ក្រុង និងមន្ត្រីជំនាញនោះទេ។ ការដាំបង្គោលរបងនោះក៏មិនមែនជាសំណង់រឹងមាំអ្វីដែរ គ្រាន់តែដាំបង្គោលថ្មទេ ប៉ុន្តែយើងបានហាមឃាត់ និងផ្អាកជាបណ្តោះអាសន្ន ដោយរង់ចាំការផ្ទៀងផ្ទាត់របស់មន្ត្រីជំនាញ»៕
