អភិបាលខេត្ត​កំពង់ចាម ៖ គោលដៅ សំខាន់​បំផុត​របស់​យុវជន​សស​យក​គឺ​ការកសាង កម្លាំង​ធ្វើ​ការងារ​ដោយ​ឆន្ទៈ​មោះមុត​និង​ស្មារតី​ស្មោះត្រង់

​កំពង់ចាម ៖ ក្នុង​កិច្ចប្រជុំ​បូក​សរុប​លទ្ធផល​ការងារ​ប្រចាំឆ្នាំ​២០២០ និង​លើក​ទិសដៅ អនុវត្ត ឆ្នាំ ២០២១ របស់​គណៈកម្មាធិការ​សហភាព​សហព័ន្ធ​យុវជន​កម្ពុជា​ខេត្ត​កំពង់ចាម នា​ព្រឹក​ថ្ងៃទី​១៨ ខែ​កុម្ភៈ ឆ្នាំ ២០២១ ឯកឧត្តម អ៊ុន ចាន់​ដា អភិបាលខេត្ត​កំពង់ចាម​បាន​ថ្លែងថា​គោលដៅ​សំខាន់​បំផុត​របស់​សហ​ភាព​សហព័ន្ធ​យុវជន​កម្ពុជា​គឺ​ការកសាង​កម្លាំង​ធ្វើ​យ៉ាងណាឲ្យ​យុវជន​របស់​យើង​ធ្វើ​ការងារ​ប្រកប ដោយ​ឆន្ទៈ​មុះមុត​និង​ក្នុង​ស្មារតី​ស្មោះត្រង់ ដើម្បី​ចូលរួម​ការពារ​រាជរដ្ឋាភិបាល ស្រប​ច្បាប់​ក្រោម​ការដឹកនាំ​ប្រកបដោយ​គតិបណ្ឌិត​របស់​សម្តេច អគ្គមហាសេនាបតី តេ​ជោ ហ៊ុន សែន នាយករដ្ឋមន្ត្រី​កម្ពុជា ព្រោះ​ឆន្ទៈ​នេះ​ហើយ​ជា​មូលដ្ឋានគ្រឹះ​សម្រាប់ ចូលរួម​អភិវឌ្ឍន៍​ប្រទេសជាតិ​របស់​យើង​ឲ្យ​កាន់តែ​មាន​ការរីកចម្រើន ។

​ឆ្លៀត​ក្នុង​ឱកាស​នោះដែរ ឯកឧត្តម អ៊ុន ចាន់​ដា អភិបាលខេត្ត​កំពង់ចាម​បាន​ថ្លែង​ថា​រដ្ឋបាល​ខេត្ត​កំពង់ចាម​បាន​ផ្តល់​ការគាំទ្រ​និង​សហការ​ជានិច្ច​ចំពោះ​ការអនុវត្ត​ការងារ​របស់​សហភាព​សហព័ន្ធ​យុវជន​កម្ពុជា​គ្រប់​លំដាប់ថ្នាក់​ដែល​មាន​គោលដៅ​បម្រើ​ផលប្រយោជន៍​សាធារណៈ​នៅ​គ្រប់​មូលដ្ឋាន​។​

​ជាមួយគ្នា​នោះ រដ្ឋបាល​ខេត្ត​កំពង់ចាម ក៏​មាន​ការប្តេជ្ញា​ចិត្ត​ខ្ពស់​ក្នុង​ការចូលរួមចំណែក​យ៉ាង​ខ្លាំងក្លា​ប្រកបដោយ​ចក្ខុវិស័យ​វែងឆ្ងាយ​ក្នុង​ការអនុវត្ត​ការងារ​របស់​ខ្លួន​ដោយ​ត្រូវ​សហការ​ជាមួយ​ដៃគូ​អភិវឌ្ឍ​នានា​ទាំង​វិស័យ​ឯកជន​អង្គការ​មិនមែន​រដ្ឋាភិបាល និង​អ្នកពាក់ព័ន្ធ​ទាំងអស់​ក្នុង​សង្គម ក្នុង​នោះ​យុវជន​ដែល​ជា​ធនធានមនុស្ស​ប្រកប ដោយ​ចំណេះ ជំនាញ និង​ឆន្ទៈ​ស្រឡាញ់​ការអភិវឌ្ឍ​សង្គមជាតិ និង​ជា​អ្នក​បន្ត​វេណ​ក៏​ត្រូវបាន​យកចិត្តទុកដាក់​ផងដែរ​។​

​លោកជំទាវ ដាំ ដា​រ៉ានី រដ្ឋលេខាធិការ​ក្រសួង​ការពារជាតិ​អនុប្រធាន​ទី​១​សហភាព​សហព័ន្ធ​យុវជន​កម្ពុជា បាន​ពាំនាំ​មក​នូវ​ប្រសាសន៍​ផ្តាំផ្ញើ​សាកសួ​រសុខ​ទុក​ពី សំណាក់ ឯកឧត្ដម ហ៊ុន ម៉ា​នី​ប្រធាន​សហភាព​សហព័ន្ធ​យុវជន​កម្ពុជា ហើយក៏​បាន​ធ្វើការ​សំណូមពរ​ដល់​សហភាព​សហព័ន្ធ​យុវជន​កម្ពុជា​ខេត្ត​កំពង់ចាម​ឲ្យខិត​ខំ​ពង្រឹង​និង​ពង្រីករ​ចនាស​ម្័​ពន្ធ​របស់​ខ្លូន​ឲ្យមាន​ការរីកចម្រើន​ដើម្បី​បំពេញ​បេសកកម្ម​បម្រើ​ដល់​សង្គមជាតិ​ជា​ពិសេស​ត្រូវ​អនុវត្ត​តាម​អនុសាសន៍​ដ៏​ខ្ពង់ខ្ពស់​របស់ សម្តេច​អគ្គមហាសេនាបតី​តេជោ ហ៊ុន សែន នាយករដ្ឋមន្ត្រី​កម្ពុជា ក៏​ដូច​ជា​សារ​អប់រំ​នានា​របស់​ក្រសួង​សុខាភិបាល​ដើម្បី​បន្ត​ចូលរួម​ទប់ស្កាត់​ការរីក​រាលដាល​នៃ​ជម្ងឺ​កូវី​ដ (Covid-19) ផងដែរ ៕​