​អភិបាល​ខេត្ត​កំពត ចុះ​ពិនិត្យ និង​ជំរុញ​ស្ថាបនា​ខឿន​ជ​ញ្ចើម​ផ្លូវអម​សងខាង​ផ្លូវ​ប៉េតុង ពី​ចំណុច​ភ្លើងស្តុប​ផ្សារ​សាមគ្គី ទៅដល់​ផ្លូវ​រថភ្លើង​

កំពត ÷ នៅ​រសៀល​ថ្ងៃ​ព្រហស្បតិ៍ ទី​១៨ ខែ​កុម្ភៈ ឆ្នាំ​២០២១ ឯកឧត្តម ជាវ តា​យ អភិបាល​ខេត្ត​កំពត និង​មាន​ការចូលរួម ពី​អភិបាលក្រុង​កំពត ចៅសង្កាត់​កំពង់បាយ និង​មន្ត្រី​ជំនាញ​នៃ​មន្ទីរ​សាធារណការ​និង​ដឹកជញ្ជូន​ខេត្ត បាន​អញ្ជើញ​ចុះ​ពិនិត្យ​ការស្ថាបនា​សាងសង់​កែលម្អ​បន្ថែម​ផ្លូវ និង​ផ្លូវ​ថ្មើជើង​អ្នកដំណើរ និង​ប្រព័ន្ធ​លូ​អម​សងខាង​ផ្លូវ​បេតុង លើ​កំណាត់​ផ្លូវជាតិ​លេខ​៣ ចាប់ពី​ភ្លើងស្តុប​ផ្លូវបំបែក​ផ្សារ​សាមគ្គី​ទី​រួម​ខេត្តកំពត ទៅដល់​ផ្លូវ​រថភ្លើង ដែល​ជា​គម្រោង​ផ្លូវ​បេតុង​សរសៃដែក មាន​ប្រវែង​១.១០០​ម៉ែត្រ ទទឹង​១២,៨​ម៉ែត្រ កម្រាស់ ២,៤​តឹក​(០,២៤​ម៉ែត្រ​) ដែល​អនុវត្ត​គម្រោង​សាងសង់​ដោយ​ក្រុមហ៊ុន CRBC​។​

​ក្នុងឱកាស​នោះ ឯកឧត្តម ជាវ តា​យ បាន​ជំរុញ​ដល់​ក្រុម​អ្នកម៉ៅការ​អោយ​ពន្លឿន​នៃ​ការ​ស្ថាបនានេះ​អោយបាន​ឆាប់រហ័ស និង​មាន​គុណភាព សោភ័ណ្ឌភាព ព្រោះ​ផ្លូវ​នេះ​គឺជា​ផ្លូវ​មួយ​ដែល​សំខាន់​សម្រាប់​ធ្វើដំណើ​ររ​បស់​ប្រជាពលរដ្ឋ ក៏ដូចជា​ភ្ញៀវទេសចរ​ដែល​មក​កំសាន្ត​ក្នុង​ខេត្ត​កំពត​។

​ជាមួយគ្នានេះដែរ ឯកឧត្តម​អភិបាលខេត្ត​បាន​អោយ​អាជ្ញាធរ​ក្រុង និង​មន្ទីរ​សាធារណៈការ​ខេត្ត រៀបចំ​ប្រព័ន្ធ​លូ​អម​សងខាង​ផ្លូវ​អោយបាន​ត្រឹមត្រូវ​តាម​ស្តង់ដារ ជៀសវាង​មាន​ការ​លិច​ទឹក ឬ​ស្ទះលូ​ដែល​អាច​បណ្តាលអោយមាន​ការខូចខាត​ផ្លូវ និង​បាត់បង់​សោភ័ណ្ឌភាព​ក្នុងក្រុង​។ ឯកឧត្តម​អភិបាលខេត្ត ក៏​បាន​ណែនាំ​ដល់​អាជ្ញាធរ​ក្រុង សង្កាត់ និង​មន្ទីរ​សាធារណការ និង​ដឹកជញ្ជូន​ខេត្ត ត្រូវ​សហការ​គ្នា ក្នុង​ដំណើរការ​អនុវត្ត​គម្រោង​ស្ថាបនា​កែលម្អ​តាម​ដងផ្លូវ​នេះ​ឲ្យបាន​ល្អ និង​សម្រេចបាន​លទ្ធផល​ជោគជ័យ​។​

​សូម​បញ្ជ​ក់ថា ក្រោយ​ពី​គម្រោង​ស្ថាបនា​ផ្លូវ​ប៉េតុង​របស់​ក្រុមហ៊ុន CRBC រួចរាល់​មក រដ្ឋបាល​ខេត្ត​កំពត ឯកឧត្តម​ជាវ តា​យ អភិបាលខេត្ត ក៏​បាន​បន្ត​ការកែលម្អ សោភ័ណភាព អនាម័យ​បរិស្ថាន តាម​ចិញ្ចើម​ផ្លូវ ដូចជា​ការកែលម្អ​ប្រព័ន្ធ​លូ និង​ផ្លូវ​ថ្មើជើង​អ្នកដំណើរ ព្រម​ទាំង​គម្រោង​ដាំ​ដើមឈើ​អម​សងខាង​ផ្លូវ​បន្ថែម​ទៀត​ជា​ដើម​៕