​បាក់​ដី​សង្កត់​ស្លាប់​មនុស្ស​ម្នាក់​ពេល​ជីកដី​គ្រួស​ដឹកយក​ទៅ​លក់​

កំពត ៖ ប្រជាពលរដ្ឋ​ម្នាក់​ឈ្មោះ ហេង ទូច ហៅ​អេ អាយុ​47​ឆ្នាំ មាន​ប្រពន្ធ​មាន​កូន​រស់នៅ​ភូមិ​ភ្នំ​ខ្យង ឃុំ​ប្រាសាទ ភ្នំ​ខ្យង ស្រុក​កំពង់ត្រាច​ខេត្ត​កំពត ។

​កាលពី​វេលា​ម៉ោង​8/30​នាទី​ព្រឹក ថ្ងៃទី​18 ខែ​កុម្ភៈ ត្រូវ​បាន​ដី​បាក់​សង្កត់​ស្លាប់ ពេល​ដឹក​យក​ទៅ​សង្គ្រោះ នៅ​មន្ទីរ​ពេល​ខេត្តតាកែវ តែ​មិន​ទាន់​ដឹក​ដល់​ផង​ក៏​ដាច់ខ្យល់​ស្លាប់​តែម្ដងទៅ ។​

​បើ​យោង​តាម​ការ​អោយ​ដឹង​ពី​ប្រជាពលរដ្ឋ​ដែល​មាន​លំនៅដ្ឋាន​ជិត​កន្លែងកើតហេតុ​បាន​និយាយ​ប្រាប់​អោយដឹងថា ជនរងគ្រោះ​ឈ្មោះ ហេង ទូច ហៅ​ក្រៅ អេ បាន​ជីកដី​គ្រួស​ក្រហម​នៅលើ​ទីទួល​ជាប់​ភ្នំ​ខ្យង​នេះ​ជាប្រចាំ​ដឹក​លក់​តាម​គោយន្ត​ជាមួយនិង​អ្នក​ភូមិ​ម្នាក់​ទៀត ។

​អ្នកភូមិ​ដដែល​បាន​និយាយ​ប្រាប់​បន្តថា ជា​រៀង​រាល់​ដង​បើ​ជីកដី​ដាក់​គោយន្ត​ហើយ​ពួកគាត់​ទាំង​ពីរ​អ្នក​តែងតែ​ជិះ​គោយន្ត​ទៅ​ជាមួយគ្នា ។ តែ​ដឹក​ជើង​ក្រោយនេះ បន្ទាប់​ពី​ជីកដី​ដាក់​លើ​គោយន្ត​ហើយ អ្នកបើក​គោយន្ត​ក៏​បើក​ចេញមកក្រៅ​យក​ដី​ទៅ​ចាក់​អោយ​អ្នកភូមិ​មិន​ឆ្ងាយ​ពី​កន្លែងកើតហេតុ ។ តែ​ជនរងគ្រោះ​ឈ្មោះ ហេង ទូច ហៅ​អេ មិន​ព្រម​ទៅ​តាម​គោយន្ត​ទេ គឺ​គាត់​នៅ​ឡុង​ដី​តែ​ម្នាក់ឯង ហើយ​ដី​នោះ​ក៏​បាក់​សង្កត់​ជាប់​តែ​ម្ដង ។ លុះ​អ្នក​បើក​គោយន្ត​បើក​ត្រឡប់មកវិញ ទើប​ដឹងថា ដី​បាក់​សង្កត់ជាប់​ឈ្មោះ​អេ​។​

​ភ្លាមៗ​នោះ ក៍មាន​ការ​ឆោឡោ​ពី​អ្នកភូមិ​នាំគ្នា​ប្រញាប់ប្រញាល់​កាយ​ដី​យក​មនុស្ស​ចេញ​ពី​គំនរ​ដី​បាក់​ជាប់​20​នាទី​ទើប​កាយ​បាន​ដឹក​ជនរងគ្រោះ​មកកាន់​មន្ទីរពេទ្យ​ឯកជន​មួយ​នៅ​ស្រុក​បន្ទាយមាស ។ ដោយសា​តែ​មាន​របួស​ធ្ងន់ធ្ងរ​ពេក គ្រូពេទ្យ​ក៍បាន​ប្រាប់​អោយ​ក្រុម​សាច់​ញាត​ដឹក​ជនរងគ្រោះ​ដឹក​ទៅ​មន្ទីរពេទ្យ​ខេត្ត​តាកែវ តែ​ដឹក​បាន​ប្រហែល​2​គីឡូ​ក៍​ដាច់ខ្យល់​ស្លាប់​តែម្ដងទៅ ។​

​នៅ​រសៀល​ថ្ងៃ​ដ៍ដែល​នោះ លោក ហ៊ុន តេង មេឃុំ​ប្រាសាទភ្នំ​ខ្យង រួម​ទាំង​ព្រះ​សង្ឍ​នៅ​វត្តប្រ​ជា​សង្គម​ភ្នំ​ក្រពើ​ក៏បាន​ឧបត្ថម​ប្រាក់ និង​សម្ភារៈ​មួយចំនួន​ជួន​ដល់​គ្រួសារ​សព​ដែរ ។​

​គេ​បាន​សំគាល់​ឃើញថា អ្នក​ឡុង​ដី​ជីក​យក​ដី​លក់​នៅ​ចំណុច​ភ្នំ​ខ្យង​នេះ​បាត់បង់​ជីវិត​មនុស្ស​2​នាក់​ហើយ​កាលពីពេល​កន្លង​មក ៕