​សេចក្តីបំភ្លឺ​ព័ត៌មាន របស់​ស្នងការដ្ឋាន​នគរបាល​ខេត្ត​កែប​

ខេត្តកែប ៖ ស្នងការដ្ឋាន​នគរបាល​ខេត្ត​កែប​ពិនិត្យឃើញថា ថ្មីៗ​នេះ​មាន​គណនី​ហ្វេ​សប៊ុក​ក្លែងក្លាយ​បានសរសេរខ្លឹ​ម​សារ និង​ភ្ជាប់​ជាមួយ​រូបភាព​កាត់ត ផ្សព្វផ្សាយ​បរិហារ​បង្ខូចកេរ្តិ៍​អាជ្ញាធរខេត្ត ថ្នាក់ដឹកនាំ និង​មន្ត្រីនគរបាល​នៃ​ស្នងការដ្ឋាន​នគរបាល​ខេត្ត​កែប​។

​អំឡុង​ពេល​ដែល​នាយកដ្ឋាន​ជំនាញ​បាន​និង​កំពុង​ធ្វើ​ការស្រាវជ្រាវ​ស្វែងរក​ជនបង្ក គណនី​ក្លែងក្លាយ​ទាំងនោះ​ត្រូវបាន​បញ្ឈប់​ការប្រើប្រាស់ និង​បាន​បន្ត​បង្កើត​គណនី​ហ្វេ​សប៊ុក​ថ្មី ព្រមទាំង​បន្ត​ធ្វើ​សកម្មភាព​ដដែលៗ បង្ក​ឲ្យ​មហាជន​ខ្លះ​មាន​ការយល់ច្រឡំ​។ ជាក់ស្តែង​ថ្ងៃទី​១៧ ខែវិច្ឆិកា ឆ្នាំ​២០២០ ជនអនាមិក​បាន​បង្កើត​គណនី​ហ្វេ​សប៊ុក​ក្លែងក្លាយ​ឈ្មោះ Tiger Valentinë បាន​សរសេរ​ខ្លឹមសារ និង​ភ្ជាប់​ជាមួយ​រូបភាព ផ្សព្វផ្សាយ​បរិហារ​បង្ខូចកេរ្តិ៍​ថ្នាក់ដឹកនាំ​ស្នងការដ្ឋាន​នគរបាល​ខេត្ត​កែប ដែល​ខ្លឹមសារ​ផ្ទុយ​ពី​ការ​ពិត​ទាំងស្រុង​។​

​លោក​ឧត្តមសេនីយ៍ទោ សម្បត្តិ សុធា​រដ្ឋ ស្នងការ​នៃ​ស្នងការដ្ឋាន​នគរបាល​ខេត្ត​កែប បាន​ដាក់​បទបញ្ជា​ឱ្យ​កម្លាំង​ជំនាញ​ធ្វើ​ការស្រាវជ្រាវ​បន្ទាន់ និង​ឈាន​ដល់​ការកោះអញ្ជើញ​ម្ចាស់​រូបថត​ពិត​មាន​ឈ្មោះ លី រតនា ភេទ​ប្រុស អាយុ ៣០​ឆ្នាំ ជា​មន្ត្រី​បម្រើ​ការងារ​នៅ​វរ​សេនា​តូច​៤៣០ នគរបាល​ព្រំដែន​ទឹក​ប្រចាំ​ខេត្ត​កែប មក​ធ្វើ​ការសាកសួរ​បំភ្លឺ​។ នៅ​ចំពោះមុខ​សមត្ថកិច្ច ឈ្មោះ លី រតនា បញ្ជាក់ថា គណនី​ហ្វេ​សប៊ុក​ឈ្មោះ Tiger Valentinë មិនមែន​ជា​កម្មសិទ្ធិរ​បស់​លោក​ទេ រីឯ​រូបថត​នោះ​ជា​រូប​ពិត​របស់​លោក​ដែល​ត្រូវបាន​ជន​មិន​ស្គាល់​អត្តសញ្ញាណ​ទាញ​យក​រូបថត​នោះ​ពី​គណនី​ហ្វេ​សប៊ុក​ផ្ទាល់ខ្លួន​របស់​គាត់ យក​ទៅ​បង្កើត​គណនី​ក្លែងក្លាយ​ធ្វើ​សកម្មភាព​ទុច្ចរិត​បង្ក​ឲ្យ​ប៉ះពាល់​ដល់​កិត្តិយស និង​សេចក្តីថ្លៃថ្នូរ​របស់​ថ្នាក់ដឹកនាំ នៃ​ស្នងការដ្ឋាន​នគរបាល​ខេត្ត​កែប​។ ឈ្មោះ លី រតនា បាន​សំណូមពរ សូម​ឱ្យ​សមត្ថកិច្ច​ជំនាញ​មេត្តាជួយ​ស្រាវជ្រាវ​ស្វែងរក​ជនអនាមិក​ដែល​បន្លំ​លួច​បង្កើត​គណនី​ហ្វេ​សប៊ុក​របស់​ខ្លួនយ​កមកផ្តន្ទាទោស​តាម​ច្បាប់​។

ស្នងការដ្ឋាន​នគរបាល​ខេត្ត​កែប សូម​ធ្វើ​ការបដិសេធ​ទាំងស្រុង​ចំពោះ​ខ្លឹមសារ​ព័ត៌មាន​ទាំងឡាយ​ដែល​បាន​ផ្សព្វផ្សាយ​នៅ​ក្នុង​បណ្តាញ​ទំនាក់ទំនង​សង្គម​តាមរយៈ​គណនី​ហ្វេ​សប៊ុក​ក្លែងក្លាយ​ទាំងនោះ​។ បច្ចុប្បន្ន ចរន្ត​ការងារ​នៅក្នុង​អង្គភាព​គោរព​តាម​ឋានានុក្រម​ត្រឹមត្រូវ និង​មាន​សាមគ្គីភាព​ផ្ទៃក្នុង​ល្អ​។​

​ចំពោះ​ករណី​ជន​បង្កើត​គណនី​ក្លែងក្លាយ​នេះ ស្នងការដ្ឋាន​នគរបាល​ខេត្ត​កែប កំពុង​សហការ​ជាមួយ​នាយកដ្ឋាន​ជំនាញ​ធ្វើការ​ស្រាវជ្រាវ និង​កំណត់​មុខសញ្ញា​ជនសង្ស័យ ដើម្បី​ឈានដល់​ការ​នាំខ្លួន​មក​ផ្តន្ទាទោស​តាម​ផ្លូវច្បាប់​។​

​ស្នងការដ្ឋាន​នគរបាល​ខេត្ត​កែប សូម​ថ្លែងអំណរគុណ​យ៉ាង​ជ្រាលជ្រៅ​ចំពោះ​សាធារណៈជន​ដែល​តែងតែ​ចូលរួមចំណែក​ក្នុង​ការសហការ​ជាមួយ​កម្លាំង​ជំនាញ នៃ​ស្នងការដ្ឋាន​នគរបាល​ខេត្ត​កែប ក្នុង​ការរក្សា​សន្តិសុខ សណ្តាប់ធ្នាប់​សាធារណៈ និង​សុវត្ថិភាព​សង្គម និង​ក៏​សូម​អំពាវនាវ​ដល់​សាធារណៈជន ពិសេស​អ្នក​និយម​ប្រើប្រាស់​បណ្តាញ​ទំនាក់ទំនង​សង្គម សូមមេត្តា​ចៀសវាង​ផលិត​ខ្លឹមសារ​ព័ត៌មាន និង​ចែករំលែក​ព័ត៌មាន​បន្ត​ដែល​ខ្វះ​ការពិចារណា និង​ពុំ​មាន​មូលដ្ឋាន​ស៊ើប​បញ្ជាក់​ច្បាស់លាស់ ដែល​អាច​បង្ក​ឱ្យ​មហាជន​មាន​ការយល់ច្រឡំ​មក​លើ​ថ្នាក់ដឹកនាំ មន្ត្រី និង​ស្ថាប័ន​អនុវត្ត​ច្បាប់​៕