​តំបន់​ទេសចរណ៍​ទឹកធ្លាក់​ស្រែអំពិល ដែល​មាន​ចម្ងាយ​ផ្លូវ 12​គីឡូម៉ែត្រ​រង​ការខូចខាត​ក្នុងការ​ពិបាក​ធ្វើ​ដំណើរ​ត្រូវបាន​អាជ្ញាធរ​ខេត្ត​កសាង​ជាថ្មី​វិញ​ហើយ ធ្វើឲ្យ​ប្រជាពលរដ្ឋ​សហគមន៍ និង​អាជ្ញាធរ​រីករាយ​យ៉ាង​ក្រៃលែង ដែល​ទទួលបាន​សមិទ្ធ​ផល​ផ្លូវ​ថ្មី

​ខេត្ត​កំពង់ឆ្នាំង ៖ ផ្លូវ​មួយ​ខ្សែ​មាន​ប្រវែង ចំនួន​12 គីឡូម៉ែត្រ ដែល​ជា​ផ្លូវ​ដ៏​លំបាក​​ទៅកាន់​តំបន់​ទេសចរណ៍​ទឹកធ្លាក់​ស្រែអំពិល ត្រូវបាន​អាជ្ញាធរ​ខេត្ត​រៀបចំ​កសាង​ផ្លូវ​ថ្មី​ឡើងវិញ​ហើយ ជាមួយគ្នានេះ ប្រជា​​ពលរដ្ឋ សហគមន៍ និង​អាជ្ញាធរ​មាន​សេចក្តី​រីករាយ​ត្រេកអរ និង​សូម​ថ្លែង​​អំណរគុណ ដល់​អាជ្ញាធរ​ខេត្ត ដែល​បាន​ផ្ដល់​ថវិកា និង​គ្រឿងចក្រ ទៅ​ជួសជុល កសាង​ផ្លូវ​ទៅកាន់​តំបន់​ទេសចរណ៍​ទឹកធ្លាក់​ស្រែអំពិល​មួយ​នេះ ។​

​រមណីយដ្ឋាន​តំបន់​ទេសចរណ៍​ទឹកធ្លាក់​ស្រែអំពិល​មាន​ទីតាំង ស្ថិតនៅក្នុង​ភូមិ​ក្តុល ឃុំ​ក្តុល​សែន​ជ័យ ស្រុក​ទឹកផុស ខេត្ត​កំពង់ឆ្នាំង

លោក សុខ សុវណ្ណ ជំទប់​ទី​១ ឃុំ​ក្តុល​សែន​ជ័យ បាន​ប្រាប់​ភ្នាក់ងារ​យើង​នៅ​ព្រឹក​ថ្ងៃទី ១៨ ខែវិច្ឆិកា ឆ្នាំ​២០២០ នេះ​ថា​. ដោយ​មាន​ការយកចិត្ត​ទុកដាក់​ពី​អាជ្ញាធរខេត្ត ពិសេស​ឯកឧត្តម ឈួ​រ ច័ន្ទ​ឌឿ​ន អភិបាលខេត្ត​កំពង់ឆ្នាំង បាន​ផ្ដល់​នូវ ផ្លូវ​មួយ​ខ្សែ​មាន​ប្រវែង ចំនួន​12​គី​ឡូ​ម៉ែត្រ​ធ្វើ​អំពី​ផ្លូវ​ក្រាល​គ្រួស​ក្រហម មាន​ទទឹង 5 ម៉ែត្រ ចេញពី​ចំណុច​មណ្ឌល​​សុខភាព​ឃុំ​ក្តុល​សែន​ជ័យ រហូតដល់​កន្លែង​ទឹកធ្លាក់ ដែល ពេលនេះ ក្រុម​​ការងារ កំពុងតែ​កសាង ដោយ​ចាប់ផ្ដើម​ធ្វើ​ពី​ថ្ងៃ​ទី 16 ខែវិច្ឆិកា មកដល់ពេលនេះ រយៈពេល​បី​ថ្ងៃ​ហើយ សង្ឃឹមថា​នឹង​រួចរាល់​ក្នុង​ពេល​ឆាប់ៗ​ខាងមុខនេះ ។

លោក ជំទប់​ទី​មួយ​ឃុំ​ក្តុល​សែន​ជ័យ បាន បានបញ្ជាក់ ទៀតថា ដើម្បីឱ្យ ផ្លូវ​នេះ​មាន​ភាព​ធំ​ទូលាយ​បានល្អ ទាំង​អាជ្ញាធរ​ក៏​ដូច​ជា​ពី​ប្រជាពលរដ្ឋ រស់នៅ​តាម​ដងផ្លូវ​ក៏បាន​ចូលរួម​បរិច្ចាគ​ដី ជាប់​ភូមិដ្ឋាន​របស់គាត់​ផងដែរ ព្រោះ​ផ្លូវលំ​មួយ​ខ្សែ​នេះ​នឹង​ធ្វើឲ្យ មាន​ការអភិវឌ្ឍន៍​ឃុំ​ក្តុល​ល​សែន​ជ័យ ឲ្យ​កាន់តែ​មាន​ភាពប្រសើរឡើង​ថែម ដែល​បានមកពី ចំណូល​ទេសចរណ៍ធម្មជាតិ ទឹកធ្លាក់​ស្រែអំពិល ដែល​យើង​បាន​រៀបចំ​ក្នុង​រយៈពេល 3 ឆ្នាំ​កន្លងទៅនេះ ។

​គួរ​រំលឹក​ដែរ​ថា តំបន់​ទេសចរណ៍​ទឹកធ្លាក់​ស្រែអំពិល គឺជា​រមណីយដ្ឋាន​ធម្មជាតិ​មួយ ដែល​ទើប​បង្កើត ឡើង​កាលពី​៣​ឆ្នាំ​កន្លងទៅនេះ​ក្រោម​ការផ្ដួចផ្ដើម របស់​សហគមន៍​ទឹកធ្លាក់​ស្រែអំពិល ក៏ដូចជា​អាជ្ញាធរ​ឃុំ​ក្តុល​សែន​ជ័យ ដែល​មាន​លោក ម៉ឹង វិសាល​សុខ ជា​មេឃុំ បាន​ធ្វើឱ្យ​មាន​ភ្ញៀវទេសចរ​ជាតិ និង​អន្តរជាតិ ទៅ​ទស្សនា​យ៉ាងច្រើន ដោយសារតែ រមណីយដ្ឋាន​មួយ​នេះ ត្រូវបាន​កសាង​និង​អភិវឌ្ឍ គួរឲ្យកត់សម្គាល់ ។​ប៉ុន្តែ អ្វី​ដែល​ចាំបាច់​នោះ​គឺ​ខ្វះខាត​ផ្លូវ​មួយ​ខ្សែ ហើយ​ពេលនេះ​កំពុងតែ​សាងសង់​ថ្មី​សង្ឃឹមថា​បន្ទាប់​ពី​ផ្លូវ​មួយ​ខ្សែ​នេះ កសាង​រួចរាល់​ហើយ នឹង​មាន​ភ្ញៀវ​ទេសចរណ៍​ជាតិ​អន្តរជាតិ​កាន់តែ​ទៅលេង​កំសាន្ត​ច្រើន​ជាង​នេះ​ទៅទៀត​៕