​កម្លាំង​សមត្ថកិច្ច​ចម្រុះ​ចុះ​ប្រតិបត្តិការ​ស្ទាក់​ចាប់​រថ​យន្ត​យី​ឌុប​ភ្លៅ​៥​មួយ​គ្រឿង​ដឹក​ឈើ​ចម្រុះ​លាក់​បង្កប់​ក្នុង​ឈើ​ផ្ទះ​ចាស់ ដឹកជញ្ជូន​លើ​ផ្លូវជាតិ​លេខ​៥ ដោយ​គ្មាន​លិខិតអនុញ្ញាត​ពី​សមត្ថកិច្ច​ជំនាញ​

ខេត្ត​កំពង់ឆ្នាំង ៖ នៅ​ព្រឹក​ថ្ងៃទី 19 ខែវិច្ឆិកា​ឆ្នាំ 2020 នេះ​ដោយ​មាន​ការសម្របសម្រួល ពី​លោក អ៊ិត សុធា ព្រះរាជអាជ្ញា​អម​សាលាដំបូង​ខេត្តកំពង់ឆ្នាំង​សមត្ថកិច្ច​ចម្រុះ​រួមមាន​៖ កងរាជអាវុធហត្ថ​លើ​ផ្ទៃ​ប្រទេស ,​កងរាជអាវុធហត្ថ​ស្រុក និង​មន្ត្រី​ផ្នែក​រដ្ឋបាល​ព្រៃឈើ កំពង់ត្រឡាច បាន​ស្ទាក់​ចាប់​បាន​រថយន្ត​យី​ឌុប ភ្លៅ​៥ មួយគ្រឿង កាលពី​វេលា​ម៉ោង​៩​និង​៣០​នាទី​យប់ ថ្ងៃទី​១៨ ខែវិច្ឆិកា ឆ្នាំ​២០២០ នៅតាម​បណ្តោយ​ផ្លូវជាតិ​លេខ​៥ ត្រង់​ចំណុច​ភូមិ​តា​អក ឃុំ​ពានី ស្រុក​កំពង់ត្រឡាច ខេត្ត​កំពង់ឆ្នាំង ខណៈ​ដែល​រថយន្ត​ធន់​ធ្ងន់​ខាងលើ ដឹកឈើ​អារ​ចម្រុះ បង្កប់​លាក់​ក្នុង​គំនរ​ឈើ​ផ្ទះ​ចាស់ ធ្វើចរាចរ​លើ​ផ្លូវជាតិ ដោយ​គ្មាន​ច្បាប់​អនុញាត្តិ ។​

​លោក ឯម វិចិត្រ នាយ​ផ្នែក​រដ្ឋបាល​ព្រៃឈើ កំពង់ត្រឡាច បាន​បញ្ជាក់​ឲ្យដឹងថា​៖ តាម​ការពិត ឈើ​មួយ រថយន្ត ហ៊ី​ណូ ពណ៌​ខៀវ​ពាក់​ស្លាក​លេខ ព្រៃវែង 3A.02 87 ដែល​សមត្ថកិច្ច​ចម្រុះ​សហការ​គ្នា​ចាប់​នេះ​បាន គឺ​បាន​យក​លេស សុំ​ច្បាប់​ដឹកឈើ​ផ្ទះ​ចាស់ ។​ប៉ុន្តែ​ការពិត ពេល​ដឹក គឺ​បាន​បង្កប់​ឈើ​ថ្មី​ចម្រុះ ពី​ខាងក្នុង ដោយ​ដាក់​ឈើ​ផ្ទះ​ចាស់​ពី​ខាងក្រៅ ដែល​ដឹក​ចេញពី​ភូមិ​ដី​ក្រហម ឃុំ​អន្លង់​រាប​ស្រុក​វាលវែង ខេត្ត​ពោធិ៍សាត់ ឆ្ពោះទៅ​កាន់​ខេត្ត​កំពង់ស្ពឺ ។​

​នៅពេល​សមត្ថកិច្ច​ចាប់​ឃាត់ ក្រុម​អ្នកដឹកឈើ​ប្រាប់ថា​៖ ជា​ឈើ​ផ្ទះ​ចាស់ លុះ​ពេល​សមត្ថកិច្ច​ត្រូតពិនិត្យ ឃើញ​សុទ្ឋតែ​ឈើ​អារក្តា និង​ឈើ​គ្រឿង​ថ្មីៗ ហើយ​ឈើ​ខ្លះទៀត មាន​មុខកាត់​ធំៗ ជា​ឈើ​មានតម្លៃ ។​

​ក្នុងពេលនោះ​ដែរ ក្រុម​អ្នកដឹកឈើ ទាំងនោះ នាំគ្នា​គេច​ខ្លួន​អស់ មិនឃើញ​មាន​នរណាម្នាក់​មក​ទទួល​ខុស​ត្រូវ​ឡើយ ។

​លោក ឯម វិចិត្រ បាន​បញ្ជាក់​ឲ្យដឹង​ទៀតថាៈ នៅ​ព្រឹក​ថ្ងៃទី​១៩ ខែ វិច្ឆិកា​នេះ រថយន្ត​ដឹកឈើ ល្មើសច្បាប់​ទាំងនោះ បាន​យក​មក​រក្សាទុក​នៅ​ផ្នែក​រដ្ឋបាល​ព្រៃឈើ​កំពង់​ត្រឡាច​ហើយ និង​កំពុង​ទម្លាក់​មក​ដី ដើម្បី​ធ្វើការ​វាស់វែង ។
​ប៉ុន្តែ​មិន​ទាន់​ដឹង​ចំនួន​ឈើ​ប៉ុន្មាន​ទេ​ព្រោះ​ឈើ​ច្រើនពេក វាស់​មិនទាន់​ហើយ តែ​តាម​ការសន្និដ្ឋាន​របស់​សមត្ថកិច្ច​ថា​ឈើ​ខាងលើ​នោះ អាច​ជិត​២០​ម៉ែត្រគូប ។

​លោក​ឯម វិចិត្រ នាយ​ផ្នែក​រដ្ឋបាល​ព្រៃឈើ​កំពង់ត្រឡាច បាន​បញ្ជាក់​ពី​និតិ​វិធី​បន្តថា​៖ ក្រោយពេល​ធ្វើ​ការវាស់វែង​ចប់សព្វគ្រប់ មន្ត្រី​ជំនាញ នឹង​ស្រាវជ្រាវ​រក​ម្ចាស់​ឈើ​ពិតប្រាកដ​ដើម្បី​ធ្វើ​សេចក្តីជូនដំណឹង ឱ្យ​ចូល​ខ្លួន មក​បង់​ផាកពិន័យ តាម​ផ្លូវ​ច្បាប់​ស្តីពី​ការដឹកជញ្ជូន​ផល អនុផល​ព្រៃឈើ​ដែល​នឹង​ត្រូវ​ទុក​រយៈពេល​៣០​ថ្ងៃ បើ រក​ម្ចាស់​មិនឃើញ ឬ​ម្ចាស់​មិន​ចូល​ខ្លួន​មក​ដោះស្រាយ​ទេនោះ មន្ត្រី​ជំនាញ នឹង​កសាង​សំណុំរឿង បញ្ជូនទៅ​តុលាការ​ដើម្បី​ចាត់ការ​តាម​នីតិវិធី ដល់​ពេល​នោះ រថយន្ត ក៍​ត្រូវបាន​រឹបអូស​ជា​សម្បត្តិ​រដ្ឋ​ផងដែរ ។
​នេះ​សូម​បញ្ជាក់​ផងដែរ​ថា ករណី​បង្ក្រាប​រថយន្ត​យី​ឌុប​ភ្លៅ​៥ ដឹកឈើ​ផ្ទះ​ចាស់​បង្កប់​ឈើ​ថ្មី​ចម្រុះ​ជាច្រើន​ម៉ែត្រ​គីម​ខាងលើ​នេះ​ជា​លើក​ទី​១ ហើយ​នៅក្នុង​ឆ្នាំ 2020 នេះ​៕