​ពលរដ្ឋ​៥១​គ្រួសារ មិនបាន​ចូលរួម​ដោះស្រាយ​ទំនាស់​ដីធ្លី តាម​ការអញ្ជើញ​របស់​រដ្ឋបាល​ខេត្ត​បន្ទាយមានជ័យ​

បន្ទាយមានជ័យ​÷ កាលពី​ព្រឹក​ថ្ងៃទី​១៨ ខែវិច្ឆិកា ឆ្នាំ​២០២០ នៅ​រដ្ឋបាល​ខេត្ត​បន្ទាយ មានជ័យ បាន​រៀបចំ​កម្ម​ពិធី​ដោះ ស្រាយ​ទំនាស់​ដីធ្លី​នៅ​ចំណុច អូរ​ស្វា​រអិល ក្នុងភូមិ​សូរិយា សង្កាត់​និមិត្ត ក្រុង​ប៉ោយប៉ែត រវាង​ពលរដ្ឋ ១៤ គ្រួសារ និង ៥១ គ្រួសារ ក្រោម​អធិបតីភាព​ឯកឧត្តម ង៉ោ ម៉េង​ជ្រួន អភិបាលរង​ខេត្ត និង មាន​ស្ថាប័ន​ពាក់ព័ន្ធ​ក្នុង​ខេត្ត​បន្ទាយមានជ័យ ។ ក្នុងនោះ​គេ​សង្កេតឃើញថា ភាគី​ខាង​តំណាង ពលរដ្ឋ​១៤ គ្រួសារ បាន​អញ្ជើញ ចូលរួម​ទៅ ដោះស្រាយ​តាម​ការ អញ្ជើញ​របស់ រដ្ឋបាលខេត្ត ដោយឡែក តំណាង​របស់​ពលរដ្ឋ ៥១ គ្រួសារ គឺ មិន​បាន​ទៅ ចូលរួម​តាម ការអញ្ជើញ​របស់​រដ្ឋ​បាល ខេត្ត​បន្ទាយមានជ័យ ឡើយ ។ ហើយ​ក្នុងនោះ រដ្ឋបាលខេត្ត បន្ទាយមានជ័យ​បាន​អង្គុយ រង់ចាំ​ជាច្រើន ម៉ោង នៅតែ​មិន​ឃើញ​វត្ត​មាន​ពលរដ្ឋ​៥១ ទៅ​ចូលរួម​ទៀត ទើប​ឯកឧត្តម ង៉ោ ម៉េង​ជ្រួន សម្រេច​បើក​អង្គពិធី​ប្រជុំ និង​អាន​លិខិត មួយចំនួន របស់​ក្រសួង​មហាផ្ទៃ ផងដែរ​។​

​ការ​អវត្តមាន​របស់​ពលរដ្ឋ​ភាគី​៥១ គ្រួសារ ហាក់បីដូច​ជា​មិន​គោរព ឬ ឲ្យ​តំលៃ​រដ្ឋបាល​ខេត្ត​បន្ទាយមានជ័យ សោះឡើយ ។ ដោយ​មតិ​មហាជន​ខ្លះ​លើក​ឡើង​ថា ខាង​ភាគី​តំណាងឲ្យ ពលរដ្ឋ​៥១ គ្រួសារ​មួយ​ថ្ងៃៗ គិតតែ​ស្រែក ឲ្យ​រដ្ឋបាល​ខេត្ត បន្ទាយមានជ័យ និង ថ្នាក់ដឹកនាំ ជួយ​រក​ដំណោះ បញ្ហា​ទំនាស់​ដីធ្លី​នៅ​ចំណុច អូរ​ស្វា​រអិល ចុះ​ហេតុអ្វី​ពេល​រដ្ឋបាលខេត្ត ចេញ​លិខិត អញ្ជើញ ឲ្យចូល​រួម​ទៅ​ដោះស្រាយ កាលពី​ថ្ងៃ​ទី​១៨ ខែវិច្ឆិកា ឆ្នាំ​២០២០ នៅ​ទីតាំង​រដ្ឋបាលខេត្ត មិច​មិន​ទៅ​ចូលរួម​យ៉ាង​ដូច្នេះ​? តើ​ពលរដ្ឋ ខាង​៥១ គ្រួសារ មាន​គោលបំណង​អ្វី​ឲ្យ​ពិតប្រាកដ​។

​ក្នុងនោះ​គេ​សង្កេតឃើញថា ខាង​រដ្ឋបាល​ខេត្ត បន្ទាយមានជ័យ និង ស្ថាប័ន​ពាក់ព័ន្ធ​ទាំងអស់ បាន​យកចិត្តទុកដាក់​យ៉ាងខ្លាំង ក្នុង​ការរក​ដំណោះ​ចំពោះ​បញ្ហា​ទំនាស់​ដីធ្លី​នៅ​ចំណុច​អូរ​ស្វា​រអិល ឋិត​ក្នុង​ភូមិ​សូរិយា នេះ​ចាប់​តាំងពី​ថ្ងៃ​មានទំនាស់​រហូត​មក​បច្ចុប្បន្ន​៕