ចែ​មុំ​ឈ្មួញ​ដ៍​ល្បីល្បាញ​ខាង​ដឹកជញ្ជូន​ឈើ​នៅក្នុង​ខេត្ត​សៀមរាប​អាជ្ញាធរ​និង​មន្ត្រី​ជំនាញ​មិន​ហ៊ាន​បង្ក្រាប​ខណ្ឌ​

សៀម​រាម​ ៖ ប្រភព​ពី​ប្រជាពលរដ្ឋ​នៅ​ខេត្ត​សៀមរាប បាន​ឲ្យ​ថា​លោក ម៉ុង ប៊ុន​លីម នាយ​ខណ្ឌ​រដ្ឋបាល​ព្រៃឈើ​ខេត្ត សៀមរាប​បានឲ្យដឹង​ថា​បច្ចុប្បន្ន​លោក ម៉ុង ប៊ុន​លីម នៅតែ​ឃុបឃិត​ឲ្យ​ឈ្មួញ​មួយចំនួន​ដឹកជញ្ជូន​ឈើ​ចូល​ក្រុង​សៀមរាប​និង​ដឹកជញ្ជូន​ឈើ​ឆ្លងកាត់​ខេត្ត​សៀមរាប យ៉ាង​ពេញបន្ទុក​។​

​ក្នុងនោះ​ឈ្មួញ​ឈ្មោះ ចែ​មុំ ដែល​អាង​មាន​ខ្នងបង្អែក​រឹងមាំ​នៅតែ​បន្ត​សកម្មភាព​ដឹក​ជញ្ជួន​ឈើ​ពី​ស្រុក​អង្គរជុំ ឆ្លងកាត់​ស្រុក​បន្ទាយស្រី ចូល​មក​ក្រុង​សៀមរាប យ៉ាង​រលូន​ព្រោះ​ការបង្ក្រាប​របស់​សមត្ថ​កិច្ច​បាន​ត្រឹម​ធ្វើឲ្យ​ល្អមើល​ប៉ុណ្ណោះ​។​

​ទន្ទឹម​នឹង​នេះ​ឈ្មួញ​ឈ្មោះ ចែ​មុំ តែង​យក​ឈ្មោះ​លោក ម៉ុង ប៊ុន​លីម មេ​រដ្ឋបាល​ព្រៃឈើ​ខេត្តសៀមរាប និង​យកឈ្មោះ​លោក ទា គឹម​សុទ្ធ ប្រធាន​មន្ទីរ​កសិកម្ម​ខេត្តសៀមរាប ទៅប្រើ​ដើម្បី​ការពារ​អាជីវកម្ម​របស់​ខ្លួន​យ៉ាង​ក្រអឺតក្រទម​។​

​ថ្មីៗ​នេះ​គឺ​កាលពី​ថ្ងៃ​ទី​២៩ ខែ​ធ្នូ ឆ្នាំ​២០១៩ រថយន្ត​ធំៗ​២​គ្រឿង​ដឹក​ឈើ​អុស​ប្រភេទ​កូនឈើ​ស្រស់​ត្រូវបាន​សមត្ថកិច្ច​ចាត់វិធានការ​បង្ក្រាប​ហើយ​បញ្ជូនទៅ​ស្នាក់ការ​សង្កាត់រដ្ឋបាល​ព្រៃឈើ​ស្រីស្នំ ដើម្បី​ចាត់ការ​តាម​នីតិវិធី​។​

​ប្រភព​ពី​សមត្ថកិច្ច​ពាក់ព័ន្ធ​បានឲ្យដឹង​ថា​រថយន្ត​ធុន​ធំ​ដឹក​ឈើ​ទាំង​២​គ្រឿង​នោះ​ជា​របស់​ឈ្មួញ​ឈ្មោះ ចែ​មុំ ដែល​ជា​ឈ្មួញ​ឈរជើង​រឹងមាំ​នៅក្នុង​ខេត្ត​សៀមរាប ជា​យូរ​ឆ្នាំ​មកហើយ​មិន​ដែល​មាន​សមត្ថកិច្ច​ណា​ហ៊ាន​ប៉ះពាល់​នោះទេ​។​

​ទើប​តែ​កាលពី​រសៀល​ថ្ងៃទី​២៩ ខែ​ធ្នូ ឆ្នាំ​២០១៩ កន្លង​ទៅ​ថ្មីៗ​នេះ ទំនង​ជា​ឈ្មួញ​ឈ្មោះ ចែ​មុំ ចង់​គេចវេះ​មិន​បង់លុយ​តាម​ការកំណត់​របស់​មន្ត្រី​ជំនាញ​និង​សមត្ថកិច្ច​ពាក់ព័​ន្ធ ក៏​ត្រូវ​ប្រឈម​នឹង​ការបង្ក្រាប​យក​ស្នាដៃ​បង្ហាញ​ថ្នាក់លើ​តែម្តង​។​
​ប្រភព​ស្និទ្ធ​នឹង​ឈ្មួញ​ឈ្មោះ ចែ​មុំ បានឲ្យដឹង​ថា​ឈ្មួញ​ម្នាក់​នេះ​តែង​ធ្វើ​ស កម្ម​ភាព​ដឹកជញ្ជូន​ឈើ​ពី​ភូមិ​រាជ​ជ​ន្ទ​ល់ ឃុំ​ស្រែ​ខ្វាវ ស្រុក​អង្គរជុំ ឆ្លងកាត់​ស្រុក​បន្ទាយស្រី ចូល​ទៅ​ក្រុង​សៀមរាប យ៉ាង​ពេញបន្ទុក​ដោយ​គ្មាន​ញញើត​អ្វី​ឡើយ​។

​ប្រភព​បានឲ្យដឹង​ទៀតថា ករណី​សមត្ថកិច្ច​បង្ក្រាប​រថយន្ត​ដឹក​ឈើ​របស់​ឈ្មួញ​ឈ្មោះ ចែ​មុំ កាលពី​ពេល​ថ្មីៗ​កន្លងទៅនេះ​បាន​ត្រឹមតែ​ធ្វើឲ្យ​ល្អមើល​ព្រោះ​អី​សមត្ថកិច្ច​គ្រាន់តែ​សម្រួល​ឲ្យ​ឈ្មួញ​រូប​នេះ​ធ្វើ​កិច្ចសន្យារ​មិន​ដឹកឈើ​បន្តទៀត ហើយ​ឈ្មួញ​ឈ្មោះ ចែ​មុំ គេចផុត​ពី​សំណាញ់​ច្បាប់​ដដែល​។

​ប្រការ​នេះ​ហើយ​ទើប​មជ្ឈដ្ឋាន​នានា​គ្មាន​ជំនឿ​លើ​សមត្ថកិច្ច​ខេត្ត សៀមរាប ក្នុង​ការបង្ក្រាប​បទល្មើស​ព្រៃឈើ​ព្រោះ​អី​ឈ្មួញ​ឈ្មោះ ចែ​មុំ និង​ឈ្មួញ​ច្រើន​នាក់​ទៀត​នៅតែ​អាច​ប្រព្រឹត្ត​ប ទ​ល្មើស​យ៉ាង​អនាធិបតេយ្យ​។​

\​ចំណែក​លោក ម៉ុង ប៊ុន​លីម មេ​រដ្ឋបាល​ព្រៃឈើ​ខេត្ត​សៀមរាប​និង​លោក ទា គឹម​សុទ្ធ ប្រធាន​មន្ទី​កសិកម្ម​ខេត្ត​សៀមរាប នាំគ្នា​សម្ងំ​ទទួល​ផលប្រយោជន៍​យ៉ាង​សុខ​ស្រួល​ពី​បទល្មើស​ព្រៃឈើ​ដែល​បន្ត​កើត​ឡើង​យ៉ាង​រាលដាល​ហើយ​មិន​ខ្វល់​ពី​ការរិះគន់​អ្វី​ទាំងអស់ ៕