បើកបរ​បញ្ច្រាសទិស​គ្នា របូត​កង់​ក្រោយ រថយន្ត​បង្ក​គ្រោះថ្នាក់ ដាក់​មេ​ប្រូច​បាត់​

កំពត ៖ ថ្ងៃទី​១០ ខែ​មករា ឆ្នាំ ២០២១​វេលា​ម៉ោង​២៣.០០​នាទី មាន​ករណី​គ្រោះថ្នាក់​ចរាចរណ៍​កើត​ឡើង​មួយ​លើក លើ​ផ្លូវជាតិ​លេខ​៣ (​កំពត​.​វាលរេញ​) ត្រង់​ចំណុច​មុខ​រោង​ម៉ាស៊ីន​ទឹកកក​តា​បារាំង ស្ថិតក្នុង​ភូមិ​តា​ដឹប សង្កាត់​អណ្តូង​ខ្មែរ ក្រុង​កំពត ខេត្ត​កំពត មាន​រថយន្ត​មួយ​គ្រឿង​ម៉ាក​អាមេរិកកាំង ព​ណ៍ស ពាក់​ផ្លាកលេខ​ព្រះសីហនុ​៣A-២២៩២​និង​មាន​សណ្តោង​រឺ​ម៉ក ពណ៍​ខៀវ ពាក់​ផ្លាកលេខ​ព្រះសីហនុ​៤A-១៧៦២​មិន​ស្គាល់​សាវតា ។​

​អ្នកបើកបរ​ដោយ​បុក​រួច​បាន​បើករថយន្ត​គេច​ទៅ​ដល់​ត្រង់​ចំណុច​មុខ​ក្លោងទ្វា​ចូល​វត្ត​វា​លពួច ទើប​ទុក​រថយន្ត​ចោល រួច​គេចខ្លួន​បាត់​មុន​ពេល​សមត្ថកិច្ច​ទៅ​ដល់ ។​

​រថយន្ត​បើក​ក្នុង​ទិសដៅ​ពី​ត្បូង​ទៅ​ជើង លុះ​ទៅដល់​ត្រង់​ចំណុច​ខាងលើ​បាន​របូត​កង់​ក្រោយ ១ គ្រាប់​ផ្នែក​ខាងឆ្វេង ទៅ​បុក​នឹង​រថយន្ត​មួយ​គ្រឿង​ចំ​ពីមុខ​ម៉ាក​ហាយ​ឡិនឌ័​រ ពណ៍​ប្រផេះ ពាក់​ផ្លាកលេខ​កំពត​២C-៩៣៥៥ បើកបរ​ដោយ​ឈ្មោះ​ឡៃ ឌឿ​ន ភេទ​ប្រុស អាយុ​៤៦​ឆ្នាំ​នៅ​ភូមិ​ព្រែក​អំពិល ឃុំ​កោះ​តូច ស្រុក​ទឹកឈូ ខេត្ត​កំពត​បើក ក្នុង​ទិសដៅ​ពី​ជើង​ទៅ​ត្បូង​។​

​ចំពោះ​សម្ភារៈ​ខូចខាត​:​រថយន្ត​ខូច​ធ្ងន់​១​គ្រឿង​និង​ខូច​កម្រិត​ស្រាល​យក​មក​រក្សាទុក​នៅ​អធិការដ្ឋាន​នគរបាល​ក្រុង​កំពត​។​

​គ្រោះថ្នាក់​ខាងលើនេះ​មិន​បណ្តាល​អោយ​មាន​ប៉ះពាល់​ដល់​មនុស្ស​ឡើយ​។​

​គ្រោះថ្នាក់​ខាងលើនេះ បណ្តាលមកពី​អ្នកបើក​រថយន្ត​ម៉ាក​អាមេរិកកាំង​មុន​បើកបរ​មិន​បាន​មើល​គ្រប់​ជ្រុងជ្រោយ ខ្ជីខ្ជា​រ ធ្វេសប្រហែស ខ្វះ​ស្មារតី​ប្រុងប្រយ័ត្ន បណ្តាល​អោយ​មាន​ករណី​គ្រោះថ្នាក់​ចរាចរណ៍​កើតឡើង​៕